Ralzaam asiloah dornak haltu sinak in a rami na si ahcun Tuan Thok Tuallengsianginn kai dingin naa tlak kho. ESK nih na fa caah zarhfatin man pek loin tuallengsianginn parawkarem caah suimilam zeizatdah tambik na hmuh tlak a si timi an bawmh khawh.
Zeitindah sok ding a si
Tuan Thok Tuallengsianginn (ESK) cu tuallengsianginn parawkarem paoh ah pekmi a si, thiamtlinnak a ngeimi saya nih cawnpiak a si. Na fa kha na pawngkam ah ummi tuallengsianginn he pehtlaihnak tuah in Tuan Thok Tuallengsianginn bawmhnak hmuhnak nawl halnak in min apnak na tuah khawh. Tuallengsianginn riantuannak hna nih nangmah holh tein bawmhchanh awk ah a man pek hau loin an in bawmh khawh.
Kumthum-Tling Tuallengsianginn Biahalnak Line 1800 338 663 zongah na chawnh khawh hna asiloah na pawngkam khawngsil zong bawmhnak caah na chawnh khawh hna. Na holh in bawmhnak hmuh na duh ahcun Ramhuap Calet le Holhlet Riantuannak (National Translating and Interpreting Service) 131 450 ah na chawnh khawh hna. Holhlettu kha na umnak pawngkam khawngsil asiloah Fimcawnnak Zung ah chawnh piak dingin hal cun, holhlettu cu fone chawnhnak ah a um lai i holh an leh piak lai.
Zeitik caan ahdah sok ding a si
Ngakchia hna cu Kumthum-Tling-Tuallengsianginn kai dingin min cazin an khumh kum, April 30 hlan ah kumthum an tlin ahcun ESK tinco tlakmi an si. Zoh 'zeitik caan ah dah min apnak pek a si lai'
Na fa cu January 1 le April 30 karlak ah a chuah ahcun zei kum ah dah Kumthum-Tling-Tuallengsianginn kai hram a thawk lai ti kha na thim khawh. Na fa Kum 3 a tlin kum ah asiloah, kum 4 a tlin tikah, Kumthum-Tling-Tuallengsianginn a thawk khawh. Na fa kum 3 a tlin kum ah Kumthum-Tling-Tuallengsianginn a thawk ahcun kum 5 a tlin tikah sianginn kai a thawk ve lai. Na fa kum 4 a tlin kum ah Kumthum-Tling-Tuallengsianginn ah kai dingin naa thim ahcun, kum 6 a tlin tik ah sianginn kai a thawk lai.
Zeitik ahdah na fa cu ESK kai kho ding (aa tlak) timi hngalhnak lei bawmh na herh ahcun Fimcawnnak Zung, na pawngkam khawngsil, hringtunu le ngakchia zohkhenhtu, lamnai tuallengsianginn, asiloah a tanglei bu pakhatkhat he pehtlaihnak na tuah khawh hna:
- Kumthum-Tling Tuallengsianginn Biahalnak Line 1800 338 663
- Brotherhood of St Laurence 03 9483 1183
- Foundation House 03 9389 8900
- Fka Children’s Services 03 9428 4471
- VICSEG New Futures 03 9383 2533
Ka fa hi Kumli-Tling-Tuallengsianginn ah a kai awk a si maw?
A si, Tuan Thok Tuallengsianginn (Early Start Kindergarten) ah a lut cangmi ngakchia hna zong man loin asiloah man tlawm tein Kumli-Tling-Tualleng-Sianginn ah kai khawhnak nawl an ngei. Kum 2025 thok in, Kumli-Tling-Tuallengsianginn cu Tuan-Kainak (Pre-Prep) ah a hun si thluahmah. Kum 2026 ah, suimilam 25 tiang Tuan-Kainak (Pre-Prep) cu zarhfatin in ngakchia hna caah a um lai:
- Ralzaam asiloah dornak haltu sinak in a rami an si
- Aboriginal asiloah Torres Strait Islander minung
- A chungkhar cu ngakchia kilvennak he pehtlaihnak an ngei.
A luan ciami kum ah ESK sin in min cazin na khumh ahcun na fa cu Victoria chung khoika hmun a um zongah zarh fatin a karhmi Tuan-Kainak (Pre-Prep) suimilam hna cu a hmuh khawh lai ti kha a feh ter. Chungkhar hna cu a luancia mi kum ah ESK ah min apnak an rak tuah lo hmanh ah Tuan-Kainak (Pre-Prep) caah tinco tlak an si ko lai.
Updated